Xoves, 19 de decembro. O adestrador do CD Burela FS Pescados Rubén da Primeira División LNFS, Juan Luis Alonso Doral, inaugurará esta tarde o II Trofeo do Nadal Mariñán, cita que volverá reunir o mellor fútbol sala de base na bisbarra para despedir o ano. Baixo a lenda ‘Imdecum fomentando o fútbol sala na provincia’, a Fundación Impulso ao Deporte, Cultura e Turismo na Mariña xuntará en competición un total de 8 clubs lugueses de base e 25 equipos, entre benxamín e xuvenil, o venres e sábado.
O relatorio do técnico laranxa, aberto a todo o público interesado na formación de base, terá lugar na Aula de Usos Múltiples do IES Monte Castelo de Burela, a partir das 20.00 horas: ‘Metodoloxía da defensa nas categorías de base’. Media hora antes, terá lugar a reunión técnica para os clubs participantes no torneo.
A competición futbolística arrincará mañá cos conxuntos mariñáns AD Santiago de Foz, ED Lourenzá, Cidade de Viveiro, ED Alfoz-O Valadouro, EDM Cervo e ED Burela FS, ademais do Azkar Lugo FS e o Vilalba FS. Os pavillóns burelaos Vista Alegre e Monte Castelo, xunto aos focegos de Marzán e O Cantel, albergarán a fase de grupos o venres pola tarde e sábado pola mañá. As finais, o sábado pola tarde, concentraranse na vila burelense, en Vista Alegre, Monte Castelo e Os Castros. A bomboneira acollerá a entrega de trofeos o sábado pola tarde, coincidindo co descanso do partido de Primeira División LNFS, CD Burela FS Pescados Rubén-Peñíscola (18.30 horas).