Nese senso, Santos subliña que o PSdeG-PSOE veise na obriga de tomar esta situación ante a campaña propagandística que está a levar o Partido Popular “contra a Deputación e contra quen consideran un inimigo político. É inaudito, a primeira vez na historia que un Partido ataca frontalmente a creación de emprego, sobre todo nos tempos que corren, e nos que hai 27.440 parados na provincia, e 7.000 máis dende que Feijóo está na Xunta de Galicia”.
“Co PP, as cifras do paro baten récords históricos”
A este respecto, engadiu que “co PP, as cifras do paro baten récords en Galicia e o desemprego sube por riba da media do Estado. Mentres Mariano Rajoy xa renunciou a crear emprego cando nin sequera chegara á metade do mandato, pois leva recortado 4.000 millóns de euros neste eido, e Feijóo reduciu á metade os fondos dende que goberna, declarándose incluso incompetente en emprego, a Deputación aumentou nos dous últimos anos o investimento nesta materia nun 90%. Din que destinan 4 millóns para emprego na provincia de Lugo. Debería darlles vergoña. Pero se a Deputación, que non ten as competencias e conta con 100 veces menos orzamento que a Xunta de Galicia, triplica esa partida…”, afirmou o socialista, pois mentres o Goberno galego dedica 150 euros por desempregado, a Deputación destina 481 euros”.
A etapa de Feijóo, “un trauma para os lucenses”
O secretario de Política Municipal explicou que a etapa de Goberno de Feijóo na Xunta de Galicia está a supoñer “un verdadeiro trauma” para os galegos e os lucenses debido á falta de sensibilidade das políticas dos populares. “No contexto de crise actual están a romper as estruturas sociais que considerabamos como seguras en termos de progreso económico e en igualdade social”, destacou o socialista.
A pesares de que dende o Partido Popular se nega este aumento exponencial das desigualdades, numerosos estudos como os de Eurostat, o Observatorio da Realidade de Cáritas ou o informe Foessa 2013, demostran que a “brecha social aumenta vertixinosamente, ameazando a cohesión social necesaria para calquera proxecto de sociedade”. Proba delo é que, mentres o Centro de Investigacións Sociolóxicas (CIS) cada mes mostra que o paro é o principal problema que perciben os galegos, o Partido Popular de Feijóo segue aplicando políticas de contención de gasto que fomentan a austeridade das administracións e desvalorizan o fluxo comercial do capital, propiciando a caída do consumo. Pero ademais as políticas económicas impostas por Mariano Rajoy, como a desregulación do mercado de traballo, afondaron máis no aumento do paro debido á facilidade de despedimento por parte dos empresarios, “perseguindo o suposto mantra da competitividade empresarial por medio da moderación salarial”.
Malia que todos os indicadores mostran que o número de desocupados non para de aumentar, os Gobernos do PP insisten en que se está a saír da crise, esquecendo que se está a deixar atrás a enormes capas sociais que non poderán reincorporarse como parte activa da sociedade, e que están abocados á precariedade. Un colectivo social que está a ser especialmente castigado ademais dos mozos son os maiores de 55 anos, vítimas da maioría dos EREs executados na provincia; de aí que os socialistas pidan tamén un plan específico para estes dous colectivos.
Castigo do PP
Neste contexto de desigualdade, paro e pobreza, no que a Xunta é a única administración que ten competencias en materia laboral, as políticas de emprego autonómicas caracterízanse por unha diminución do diñeiro presupostado en fomento do emprego, e no uso partidista dos plans para premiar ós Concellos gobernados polos populares. “Cada ano asistimos ó castigo que somete Feijóo ós galegos reducindo as partidas presupostarias para inserción laboral. Para os orzamentos de 2014, Feijóo volve demostrar que goberna de costas á cidadanía, recortando case 10 millóns de euros as políticas activas de emprego”.
Ademais, engade secretario de Política Municipal, os obradoiros de emprego da Xunta poñen de manifesto a exclusión que sofren algúns cidadáns polo feito de residir en municipios gobernados por Alcaldes que non sexan do Partido Popular. A discriminación padecida polos lucenses, subliña, vén determinada polas bases que regulan a concesión destes proxectos, que esixen ter rexistrados 500 desempregados. Para a realidade da pranta municipal da provincia, este criterio supón “unha exclusión de facto”, xa que a poboación destes é moi reducida.
Por outra banda, o Goberno galego premia os proxectos intermunicipais, fomentando prácticas partidistas no deseño dos obradoiros. Así, os Concellos gobernados polo PP únense, illando ós municipios socialistas e xerando verdadeiras zonas de sombra onde se imposibilita ós lucenses recibir as políticas laborais da Xunta. O resultado do “clientelismo” de Feijóo é que dos 21 obradoiros asignados para Lugo en 2013, 19 están gobernados polo PP, concluíu Álvaro Santos.