A concelleira de Cultura, Mónica Pedre, sinalou que “o que lles plantexamos desde o equipo de goberno é que Burela celebre o Antroido, pero sen saírnos do guión do ano pasado. A situación económica é a que é, e iso debemos telo moi presente”. A edil popular considera que “o Antroido do ano pasado foi máis que digno e rexistrou unha importante participación”.
Os actos que se organicen desenvolveranse desde o 27 de febreiro ao 4 de marzo. O programa pecharase nunha nova xuntanza prevista para o vindeiro luns, 20 de xaneiro, ás oito da tarde no Concello. O presuposto do Antroido burelés está por definir, “pero será similar ao do ano pasado”.
Mónica Pedre e o alcalde, José Mª González Barcia, agradecen “a disposición e a participación de todas as asociacións que onte estiveron presentes e animamos ao resto de colectivos de Burela a que acudan á xuntanza do vindeiro luns e a que participen no Antroido de 2014 na medida das súas posibilidades”.