Santiago de Compostela, 27 de febreiro de 2014.- A Dirección Xeral de Emerxencias e Interior da Vicepresidencia e Consellería de Presidencia alerta dun temporal costeiro de nivel laranxa que afectará o litoral de Lugo e o oeste e noroeste da Coruña a partir das primeiras horas deste venres 28 de febreiro.
Segundo informa a Axencia Estatal de Meteoroloxía (Aemet), espérase mar combinada do noroeste, con ondas de entre 5 e 6 metro, podendo chegar aos 7 metros mar dentro no litoral lucense e ocasionalmente na zona de Prior-Bares. Pola súa parte, as costas da provincia de Pontevedra e a zona suroeste da da Coruña estarán en alerta amarela desde as primeiras horas do día.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos concellos das provincias afectadas; ás Deputacións, servizos provinciais e agrupacións de voluntarios de Protección Civil e aos clubs náuticos, entre outros. Deste xeito, agárdase que se adopten as medidas oportunas para garantir a seguridade dos bens e das persoas.
Tamén recórdaselle á poboación a importancia de seguir as medidas de protección como evitar aproximarse a diques ou rompentes co fin de previr un eventual golpe de mar que poida arrastrar persoas ou obxectos ou vixiar posibles caídas de obxectos desde balcóns e fiestras. Ademais, aconséllase consultar a páxina web do CAE 112 (www.112galicia.org), que conta con información meteorolóxica e con enlaces de interese.