O rexedor referíuse ao acto de Naturacción e subliñou “a colaboración entre a Fundación Alcoa e a Fundación Santiago Rey Fernández-Latorre para, xunto coa Consellería de Educación e Cultura, favorecer que a poboación infantil de hoxe en día adquira hábitos que potencien o desenvolvemento sostible, hábitos que favorezan a preocupación e a conservación do noso medio ambiente natural. Trátase dunha iniciativa realmente importante e que pode dar grandes resultados xa non só no presente senón fundamentalmente a medio e a largo prazo”.
González Barcia lembrou que “desde hai anos tanto Voz Natura coma a Fundación Alcoa veñen potenciando por separado programas e actuacións tendentes á preservación do medio ambiente. Nese sentido a unificación de esforzos, sobre todo nos tempos que corren, onde a situación económica non é a máis favorable para levar a cabo iniciativas deste tipo, creo que é unha decisión de admirar e que por iso conta co respaldo pleno da Consellería de Educación e Cultura”.
O alcalde engadiu que “desde o Concello estamos dobremente satisfeitos. Por un lado porque dous dos centros de aquí de Burela, son dos máis antigos que teñen participado nas actividades que fomenta Voz Natura, o CEIP Vista Alegre e o IES Monte Castelo, e polo que estamos tamén satisfeitos é pola presenza hoxe aquí en Burela do conselleiro Jesús Vázquez para presidir un acto desta envergadura, que como digo unifica os esforzos de dúas fundacións de grande renome en Galicia: a Fundación Alcoa e a Fundación Santiago Rey Fernández-Latorre”.
José Mª González Barcia indicou que “desde o Concello de Burela temos demostrado desde hai anos a nosa preocupación pola educación medio ambiental poñendo en marcha iniciativas coma a Aula Gaia e nese sentido amosámonos dispostos a colaborar con estas dúas fundacións, coa Consellería de Educación e cos centros de ensino de Burela. Tanto é así que as monitoras de Gaia participan de forma activa nas actividades que polas tardes se veñen desenvolvendo nos dous CEIP, tanto no Vista Alegre coma no Virxe do Carme”.