Uns 60 socios participaron na excursión a Lalín durante a Feira do Cocido que organizou a Asociación Terramar

A Asociación de Xubilados Terramar, que conta dende xaneiro con nova directiva e que preside Francisco Alves, viaxou esta fin de semana ata Lalín para asistir aos actos da 46ª Feira do Cocido e degustar este prato típico destas datas. Unha excursión na que participaron uns 60 socios da entidade, e que puideron ver de preto o pregón da feira, o desfile de Entroido, ou os diferentes expositores situados na praza da Igrexa de Lalín, onde se poñían á venda dende produtos derivados do porco ou os ingredientes necesarios para facer un cocido típico, ata doces de Entroido.

Despois de visitar a zona onde se concentran os actos tradicionais desta feira, de Interese Turístico Nacional, os participantes degustaron o cocido típico e visitaron o santuario da Virxe do Corpiño, dende onde partiron para regresar a Cervo.
Esta foi a primeira excursión do ano organizada por Terramar, e que o presidente valorou “moi positivamente, xa que tivo moi boa acollida, cunha elevada participación” e que “resultou moi entretida”. Alves anuncia que a entidade ten outras excursión programadas.

Entroido
Ademais, nos días de Entroido, Terramar ten varias actividades previstas. A primeira é un taller celebrado onte e no que os participantes elaboraron máscaras, que poderán utilizar no baile de máscaras previsto para este sábado. Será ás 18 horas no salón de actos da Casa do Mar. Unhas actividades coas que colabora o Concello de Cervo.

Outras actividades
Ao mesmo tempo, Terramar vén ofrecendo moitas actividades dende o comezo do ano, entre elas Xogando en Domingos, que se está desenvolvendo todos os domingos de 18 a 19 horas no local da asociación, na Casa do Mar. Hai unhas semanas tamén se ofreceu unha charla sobre medidas de seguridade dirixida especialmente ás persoas maiores.