A XXV Tirada de Bolos de Xove remata cunha media de 35 inscritos por xornada

A XXVª Tirada de Bolos Concello de Xove rematou nunha tarde de sol en Sumoas que rexistrou unha alta participación con preto de 35 inscritos en cada tirada chegando á media de 10 participantes na Liga  Sub 18 que asegura “o futuro dos bolos” e de onde “sairán os futuros campións”.

Na Liga Sénior Masculina non houbo sorpresas finais na categoría; aínda que a Francisco Pérez faltoulle moi pouco para arrebatarlle a terceira posición na táboa a José Vigo.  A segunda posición na tirada  obtida por Francisco non foi suficiente para acceder ao caixón, pero si lle permitiu avanzar unha posición, quedando 4º, en detrimento de Sócrates Campo que finalmente foi 5º.

“Esta Liga foi a da confirmación dunha xeración que comezou a competir hai máis de 10 anos e que está destinada a dominar a clasificación nos vindeiros”, consideran dende a organización; xa que desta nova xeración saíu o campión desta edición, Álex Meitín, ao que acompañan José Vigo (3º)  e Cristian Rodríguez (8º).  Da vella guardia, só José Rafael González foi capaz de manterse nos seus números, repetindo un moi meritorio subcampionato.

ALEX MEITÍN SERANTES	156 ptos	1º	Trofeo e premio de 200 euros
J.  RAFAEL GONZÁLEZ BERMÚDEZ	134 ptos	2º	Trofeo e premio de 150 euros
JOSE VIGO LAGE	96 pts	3º	Trofeo e premio de 100 euros

 

Nesta categoría recibiron premio en metálico e trofeo os 12 primeiros clasificados: Álex Meitín, José Rafael González, José Vigo, Francisco Pérez, Sócrates Campo, Arturo Vigo, José Manuel Cociña, Cristian Rodríguez, Luis Rancaño, Moisés Rodríguez, Jaime Álvarez e Jordi Meitín.

E o Trofeo á Mellor Bolada do Campionato (trofeo e 50 euros de premio) foi para Francisco Pérez cunha bolada de 101 puntos obtida no Campo de Palmeiro o  pasado 11 de xaneiro.

Maiores de 60 anos.- Dentro da Liga Senior Masculina, esta temporada e por segunda vez, tiña un apartado con premios ós tres séniors maiores de 60 anos que quedaran mellor clasificados na xeral. Neste caso, dentro dos maiores de 60 anos, a clasificación quedou así:

José González Bermúdez	5 ptos	1º	Trofeo e premio de 75 euros
Arturo Rodríguez Baño	2 ptos	2º	Trofeo e premio de 50 euros
Modesto Albo Vidal	2 ptos	3º	Trofeo e premio de 25 euros

 

Por último, salientar o TROFEO Ó XOGADOR MÁIS VETERANO, que un ano máis, e esperemos que sexan moitos máis, recaeu en MODESTO ALBO VIDAL, que o vindeiro mes cumplirá 85 anos.

Liga Sénior Feminina.- Confirmados xa o 1º e 2º posto, o interese da xornada estaba en ver quen das tres candidatas (Salomé, Paula e Concepción) se facían co preciado terceiro posto do caixón. Ó final foi a xovense Paula Campo quen, grazas a súa victoria, obtivo esa prezada 3ª praza, relevando a Salomé  Bermúdez á cuarta posición.

Para a temporada vindeira esperamos nesta categoría a Salomé Cardoso, dúas veces campioa da Liga Sub 18 e que a partires da agora, ao cumprir os 18, deberá disputar a Liga Sénior Feminina. Tamén esperamos para esta temporada a dobre campioa Carmen Roca, poda volver competir en toda a temporada.

BELÉN MEITÍN ROUCO	92 ptos	1º	Trofeo e premio de 90 euros
DOLORES BAÑO FRAGA	53 ptos	2º	Trofeo e premio de 75 euros
PAULA CAMPO SUÁREZ	46 ptos	3º	Trofeo e premio de 50 euros

 

En canto ó Trofeo á Mellor Bolada do Campionato (trofeo e 50 euros de premio), foi para Belén Meitín cunha bolada de 72 puntos obtida na no campo de Palmeiro o  pasado 11 de xaneiro.

Liga Sub 18.- A primeira praza desta categoría era a única por dilucidar. E dende o primeiro momento Daniel López non deixou marxe de dúbida, cun xogo moi sólido e sen erros, gañando con autoridade a tirada e proclamándose, por segundo ano consecutivo, campión desta categoría. Salomé Cardoso acompáñao no segundo escalón do  caixón  e Miguel López no terceiro. Temos que dicir, que no caso de Miguel, foi por un estreito marxe, dado que se Isaías non erra nos desquites houbese gañado a proba e desprazado a Miguel do podio. Pero finalmente, Miguel fíxose con esta prezada praza na súa primeira participación nesta Liga, e dada as súas condicións físicas e técnicas, non nos cabe ningunha dúbida que vai ser o xogador a batir nas vindeiras edicións desta Liga. En canto a Daniel López e a Isaías Cardoso, na vindeira temporada deberán mostrar a súa valía na Liga Senior, xa que cambian de categoría.

DANIEL LÓPEZ FERNÁNDEZ	73 ptos	1º	Trofeo e premio de 90 euros
SALOMÉ CARDOSO RODRÍGUEZ	62 ptos	2º	Trofeo e premio de 75 euros
MIGUEL LÓPEZ FORMOSO	50 ptos	3º	Trofeo e premio de 50 euros

 

En canto ó Trofeo á Mellor Bolada do Campionato (trofeo e 50 euros de premio), foi para Daniel López cunha bolada de 71 puntos obtida na no Campo de Palmeiro o  pasado 11 de xaneiro.

A entrega de trofeos estivo presidida polo Alcalde Demetrio Salgueiro quen, ao final, e despois de agradecer a tódolos xogadores a súa participación no campionato, salientou o apoio que o Concello de Xove ven prestando e presta a esta competición dende hai tantos anos.

O Concello, encargado da súa organización, agradece novamente a colaboración do IES Illa de Sarón, e máis concretamente, do Departamento de Educación Física que dirixe Xabi Bouza.