Cervo, 28 de marzo de 2014. O BNG no apoiou no pleno celebrado na tarde de onte en Cervo a modificación crédito proposta pola alcaldía para utilizar unha parte do remanente positivo de tesourería de 2013 na obra de conversión do céspede do campo municipal da Veiga de herba natural a artificial cun investimento 378.816,87 €. Dende o BNG consideran que o estado das instalacións e a presión de equipos e actividade sobre o céspede, aínda requirindo coidados e melloras na zona de vestiarios e gradas, non parece prioritario un investimento de tal contía mentres a maioría das parroquias do concello se manteñan sen redes básicas de saneamento que si consideran unha prioridade.
DEFENDEN A SÚA POSTURA COMO RESPONSÁBEL TENDO EN CONTA O CONTEXTO ECONÓMICO E AS CARENCIAS EN SERVIZOS BÁSICOS DO CONCELLO
O BNG cre que a súa posición no pleno “é responsábel tendo en conta o contexto de crise económica actual e as necesidades do concello”. Non nos parece acertado nin xustificado este investimento na actualidade a tenor do estado das instalacións deportivas da Veiga e moito menos coñecendo que das cinco parroquias do concello so unha dispón na actualidade de redes básicas de saneamento e depuración de augas residuais, aínda que outra estea en camiño de rematarse.
AS INSTALACIÓN DA VEIGA REQUIREN COIDADOS E ALGUNHA MELLORA PERO NON UN INVESTIMENTO TAN CUANTIOSO
Para a fronte nacionalista o estado do Campo Municipal da Veiga require coidados e mantemento, aos que o goberno local está obrigado, pero as actuacións prioritarias nas instalacións deben ir dirixidas á mellora de gradas e vestiarios, non a unha remodelación total do céspede para convertelo en artificial cun gasto das dimensións que se pretende.
O CONCELLO SEGUE TENDO UNHA DÉBEDA BANCARIA IMPORTANTE
Os nacionalistas aseguran que a situación da débeda bancaria municipal, aínda mellorada pola obrigas derivadas do Plan de Axuste imposto polo goberno do estado, “deberan facer reflexionar ao goberno local sobre cales son as prioridades de gasto e si se está en condicións de amortizar créditos, deberíase facer”. Ao BNG non se lle escapa que a final deste ano, “a débeda bancaria municipal repartida entre o censo municipal achegarase aos 600 euros por habitante”.
ATE AGORA O REMANENTE DE TESOURERÍA POSITIVO DEBIA IR DESTINADO OBRIGATORIAMENTE A AMORTIZACIÓN DA DÉBEDA
A medida proposta polo goberno local ven derivada da modificación regulamentaria sobre o uso do remanente positivo de tesourería para gastos xerais, que sendo positivo, abre a posibilidade de facer investimentos ate agora limitados unicamente á amortización das débedas existentes. O tipo de investimentos posíbeis definiuse nunha serie de disposicións lexislativas que limitan o gasto a actuación financeiramente sostíbeis e que entre outras serán as referidas a actuacións de saneamento e abastecemento de augas, recollida e eliminación de residuos, fomento do turismo, comercio ou aproveitamento de recursos produtivos propios, alumeado público, mellora de camiños veciñais, protección do patrimonio, etc. O goberno local deulle encaixe ao investimento no campo de fútbol da Veiga no apartado relativo a “rehabilitación e reparación de inmobles de propiedade municipal a efectos de servizo público”.