Cristóbal, actualmente residente no Centro de Alto Rendemento de San Cugat (Barcelona), aproveitou a súa estadía vacacional na Mariña lucense, para adestrarse nas nosas praias e interesarse pola II edición da Carreira Popular das Praias, que se celebrará en Barreiros o vindeiro 17 de maio.
Os organizadores da carreira comentáronlle os pormenores da proba, que consistirá en carreiras infantís que se celebrarán a partir das 11.00 horas, con varios circuítos na praia de Altar, e a carreira absoluta, que constará dun percorrido de 11 km. pola propia area das praias de Barreiros, con saída en Punta Anguieira, chegando ata a praia de Lóngara, ida e volta.
Haberá trofeos por categorías, incluíndo como novidade nesta edición as categorías de parellas, masculina, feminina e mixta.
A inscrición é totalmente gratuíta, xa que a organización quere “reivindicar o tratamento popular desta carreira fronte ó que empeza a ser un negocio neste tipo de eventos”.
Os interesados en inscribirse, poden contactar a través da web http://carreirapopulardaspraias.jimdo.com, onde teñen toda a información da carreira, no correo electrónico xose9@hotmail.com ou no teléfono 625 821 044. O prazo remata o mércores 14 de maio.
Os organizadores agardan contar cunha participación similar ou superior á da edición anterior e agradecen a colaboración de administracións, empresas e particulares para a organización da mesma e para poder ofrecer ós participantes agasallos e avituallamento ó remate da carreira.