Un lugar onde hai unhas semanas o Concello eliminou varias acacias, que se atopaban debilitadas e enfermas; unha especie foránea e invasora que foi substituída por árbores autóctonas. A partir de agora, a delegación de Medio Ambiente realizará traballos de mantemento para, pouco a pouco, conseguir unha masa vexetal frondosa. O alcalde de Cervo, Alfonso Villares, e a edil de Medio Ambiente, Begoña Alonso, comprobaron este xoves o resultado desta actuación.
Ademais, o Concello está mellorando a senda botánica, que constitúe un atractivo natural máis do Conxunto Histórico Artístico. Neste caso, repuxéronse varios exemplares de árbores que secaran ou non prenderan, e tamén se plantaron novas especies para enriquecer o espazo. En conxunto, sementáronse abeleiras, nogueiras, cerdeiras, rebolos, faias, oliveiras, aciñeiras, sobreiras, buxos, abruñeiros, pereiras bravas, capudres, teixos e chopos. Unha senda que ata o de agora estaba formada por 20 especies diferentes e que, despois destes traballos, terá ata 26.
Hai que ter en conta que todos estes traballos enmárcanse no obxectivo do Concello de recuperar a paisaxe tradicional do municipio. Un proxecto global para crear espazos verdes autóctonos a través do cal leva plantados milleiros de árbores en terreos municipais, especialmente no monte Escarabelada, moi próximo á senda botánica e á area recreativa. Unha acción que dará os seus froitos dentro de moitos anos “de la que disfrutarán las próximas generaciones, por las que vale la pena trabajar hoy”, asegura Alonso.