Nesta ocasión son uns 40 nenos e nenas de educación infantil e primaria os que participan nestas actividades que o Concello pon en marcha nos períodos de vacacións. Primeiro foron os Enredos de Verán e, despois do seu éxito, a administración local decidiu estender esta iniciativa a outras épocas como o Nadal ou, como neste caso, a Semana Santa co mesmo obxectivo en todos os casos: axudar aos pais e nais neses períodos nos que teñen que traballar mentres os seus fillos non teñen clase.
“Cos Enredos propoñemos unhas xornadas de entretemento para os pequenos e de tranquilidade para as familias” explica a edil de Servizos Sociais, Pilar Armada. Da mesma maneira, a administración local tamén pretende que os nenos e nenas teñan alternativas de diversión e aprendizaxe nas súas vacacións, dinamizando o seu tempo libre a través de actividades atractivas e participativas.
Unha filosofía, a de mesturar educación con diversión, coa que o Concello traballa en todas as actividades dirixidas ao público infantil, como é o caso tamén do Taller de Teatro Infantil (todos os venres) ou da Ocioteca (todos os sábados).