Esta iniciativa deportiva, que está posta en marcha pola institución provincial en colaboración co Concello da Pastoriza e a PTC Escuela, e que consiste nunha selección onde os participantes recibirán un curso de condución para igualar e equilibrar coñecementos entre uns e outros, celebrarase os días 27, 28 e 29 de xuño, no circuíto da Pastoriza. O proceso de selección estará supervisado por un xurado composto por pilotos, monitores de PTC e colaboradores deste proxecto
Pode formalizar a inscrición nesta promoción calquera persoa interesada, que cumpra as seguintes condicións: estar empadroado en calquera provincia da Comunidade Autónoma de Galicia, non ter experiencia previa de ningún tipo, excepto kárting, en competicións automobilísticas, estar en posesión do permiso de conducir na data na que se realicen as diferentes fases, e reunir, na data de celebración do Rallie San Froilán do ano 2014, todos os requisitos esixidos pola Federación Galega de Automobilismo para obter a Licenza de Condutor (piloto) segundo a normativa para a expedición de licencias do ano en curso.
O prazo para enviar os formularios de inscrición estará aberto a partir do sábado 1 de xuño e permanecerá aberto ata as 00:00 horas do mércores 25 de xuño de 2014, ao máis tardar, e o prezo de inscrición será de 36 euros.
O titular do primeiro premio será seleccionado como piloto e participará no Rallye San Froilán 2014 dentro da estrutura do equipo de competición Vallejo Racing-PTC de forma totalmente gratuíta. O segundo e terceiro clasificados recibirán como premio unha formación especifica de piloto recibindo un curso multidisciplinar de competición, curso ao que loxicamente tamén terá acceso o vencedor.
Neste sentido, Antonio Veiga animou “a todos os afeccionados do mundo do motor a participar no Volante Deputación de Lugo, pois de gañalo, participarían no Rallye San Froilán, unha proba histórica que este ano acada a súa XXXVI edición, e pola que teñen pasado os mellores pilotos da esfera nacional e estatal”.