Burela, 13 de maio 2014. Nun acto celebrado polo BNG en Burela a número tres da candidatura do BNG, Olalla Rodil, dixo que “o 25 de maio temos a oportunidade de votar en contra dun modelo de Europa dominado pola dereita europea, que en Galiza representa o PP de Arias Cañete e Feijóo”. Rodil, en alusión ao PP, afirmou que “aplican unha política de recortes que causan emigración, paro, pobreza e sufrimento nas familias e na maior parte da cidadanía”, e engadiu “unha política que nos impide producir, que nos impide traballar e vivir do noso”. No acto, Olalla Rodil, estivo acompañada polo voceiro do BNG no concello de Burela, Mario Pillado, a responsábel comarcal do BNG na Mariña, Ana Ermida,
“Defendemos o dereito a vivir dignamente na Galiza, tamén aquí en Burela, onde queremos vivir da pesca, do noso mar, que nos deixen traballar dos nosos recursos”, reclamou Olalla Rodil, en referencia ao sector pesqueiro que conforma unha actividade económica estratéxica en Burela e na comarca do Mariña non so no proceso extractivo senón tamén na transformación. Olalla Rodil loubou o traballo realizado pola formación nacionalista en Europa, a través da eurodeputada Ana Miranda, durante esta lexislatura onde reivindicou “un tratamento diferenciado e prioritario, con fondos específicos para o sector”.
Como exemplo da situación no parlamento europeo, Olalla Rodil, referiuse a “batalla” que o BNG deu en Europa a prol do sector como mediadora para levar as problemáticas da pesca galega alí onde se toman decisións que lle afectan. Neste sentido referiuse á flota do Gran Sol, unha zona na que os barcos mariñaos faenan dende fai décadas, “que cando entramos na CEE traballaban 300 barcos e hoxe 84, 70 deles galegos” ou á pesca da xarda con 153 barcos pescando e 2.300 toneladas de cota, mentres Alemaña con 3 dispón de 22.000 toneladas.
Rodil fixo fincapé na importancia de manter a capacidade pesqueira e transformadora “como fonte de emprego na comarca mariñá e no conxunto de Galiza”, cada posto de traballo no mar son tres ou catro en terra polo que é evidente que mentres na UE, PP e PSOE, mesmo tamén nalgún caso IU votaban nun 70% das ocasións xuntos, non estaban mirando para os intereses galegos nin tampouco poñendo por diante o mantemento de postos de traballo vinculados a un sector pesqueiro que no conxunto do Estado perdeu entre 2006 e 2011 un 50% do emprego existente.
Unha defensa que contrapuxo co “abandono e a traizón” do PP a Galiza en Europa, “onde aposta polo despezamento de barcos, cando o que pide o sector é poder traballar en igualdade de condicións ou axudas para modernizar os barcos e poder traballar en mellores condicións de seguridade”. “Esta Europa antisocial e antidemocrática non quere que os barcos galegos vaian pescar, non quere que vaian ao mar, prefire que vaian á chatarra”, criticou a candidata número 3 do BNG, que defendeu para o noso país “outras políticas” de “apoio aos sectores produtivos”.
O PP quere que quedemos na casa
A candidata nacionalista tamén lembrou que “o BNG levou a Europa a voz dos colectivos galegos que o precisaban” e fixo especial referencia aos afectados pola estafa das preferentes e aos emigrantes retornados acosados pola Facenda española que ven “roubados” os seus aforros. Olalla Rodil dixo que “o PP está empeñado en que a xente se quede na casa e non vaia votar para poder seguir facendo as cousas coma ata agora, beneficiando aos bancos e prexudicando á xente”. Denunciou tamén o “intento de silenciar ao BNG”, nos medios de comunicación públicos, “pero non o van lograr, porque Ana Miranda é unha muller galega, rabuda, loitadora e traballadora que non van poder calar”, destacou Olalla Rodil.