Estamos ante un exemplo de violencia urbana, de expresión ameazante, que inclusive incita á violencia. Non se pode confundir tolerancia con permisividade absoluta ante expresións que chegan a estimular atropelos contra a liberdade. Este é un aspecto que dende o Partido Popular de Ribadeo temos claro, polo que en todo momento manifestamos o rexeitamento, con total rotundidade, ante tales prácticas e independentemente do partido político ao que se refiran.
Ante este suposto que compartimos, non chego a entender a desidia do equipo de goberno do Concello de Ribadeo. Xa non só non amosou a súa condena pública ante esta acción, senón que tamén se nega a realizar os traballos de limpeza do muro sobre o que se fixo a pintada.
As administracións públicas deben marcar o exemplo de unidade e repulsa contra este tipo de mostras. Toda unidade contra esa acción, é mostra de repulsa. A actitude que está a tomar tanto o BNG, como o PSOE e UPRI en Ribadeo non son o mellor exemplo de cohesión.
Non só se bota en falta unha condena explícita do alcalde, que nesta condición antepón o seu partidismo e esquécese que goberna e representa a todos os ribadenses, con independencia da súa ideoloxía, senón que a maiores non chegamos a entender que o Concello negue a limpeza desta pintada. Estamos ante unha mostra de práctica antidemocrática do Sr. Suárez Barcia.
Jesús López Penabad
Presidente do Partido Popular de Ribadeo