A delegada territorial destacou o dobre obxectivo da campaña xa que, “á vez que divulga a cultura e os costumes propios dunha das actividades económicas máis importantes da Mariña, como é a pesca, da a coñecer as principais especies comercializadas nesta comarca e todo o proceso que hai detrás da posta á venda dos produtos pesqueiros”.
A máxima representante do Executivo galego na provincia recordou que esta iniciativa está aberta á participación de todos aqueles centros que o soliciten. Cómpre lembrar que na primeira edición do programa participaron 700 estudantes de toda a provincia.
Neste sentido, felicitou ao centro educativo lucense, dende o que se desprazaron tamén unha ducia de membros do corpo de persoal para participar na actividade, e estivo coas rapazas e rapaces na visita guiada á aula da confraría, na que os escolares puideron coñecer varias especies pesqueiras, artes de pesca e nós mariñeiros
Arias significou que o programa de actividades que se desenvolve en Celeiro “resulta completo para os rapaces”, xa que na mesma visita poden coñecer o proceso de subasta na lonxa, a equipación dun barco, con toda a súa carga tecnolóxica (sonar, radar, GPS, sonda…) e mesmo poden ver o operativo de salvamento que ten base no peirao celeirense co helicóptero Pesca-II.
A delegada da Xunta subliñou tamén “o alcance desta campaña”, e apuntou que a idea “é ir achegando aos rapaces do interior as características e a transcendencia do sector pesqueiro, que posúe gran relevancia socioeconómica na comunidade, e en especial, nesta comarca de Lugo”.
Colaboración
O proxecto está impulsado pola Confraría de Pescadores Santiago Apóstolo de Celeiro e a Real Liga Naval Española e Porto de Celeiro, coa colaboración da Consellería de Cultura, Educación e Ordenación Universitaria, e vai dirixido a alumnos do último ciclo de Primaria e os primeiros cursos de Secundaria. Arias gabou aos tres entes que impulsaron este programa en colaboración coa Consellería, porque se trata “dunha iniciativa que promove o acercamento a usos e costumes que forman parte da cultura e da sociedade desta zona”.
O programa está patrocinado polo Grupo de Acción Costeira, La Caixa e máis o restaurante Louzao.