Neste acto, encabezado polo presidente de ACIA Burela, Pedro Fraga, e o Alcalde de Burela, José González Barcia, tamén asistirán os principais patrocinadores do evento e adiantaranse algunhas das novidades e actividades desta nova edición.
As principais novidades que presenta a festa este ano son a ampliación de un a tres días de festa, entre o 4 e o 6 de xullo, a celebración na noite do venres dun desfile nocturno de clans e dunha multitudinaria cerimonia de vodas castrexas, así como a potenciación do mercado castrexo, ubicado en diferentes prazas da vila.
O resto de actividades manterá a liña dos anos anteriores, co protagonismo da gastronomía con menús e tapas castrexas nos locais de hostalería, xogos infantís, premios á mellor caracterización de clans e locais, sorteo de 1000 euros en vales de compra e os coñecidos xogos que acollen en cada edición a centos de participantes: a Guerra de Clans (premio 500€ en metálico e o peso do Xefe do Clan en cervexa) e a Busca do Torques de Ouro (premio 1000€).
A 3ª Festa Castrexa celebrarase en Burela entre o 4 e o 6 de xullo, durante os que as rúas e prazas da vila revivirán o seu pasado castrexo. O prazo de inscrición para participar nas actividades remata o 25 de xuño. ACIA Burela ofrece máis información na tenda de Decoraciones Pura de Burela e a través da páxina en facebook da Festa Castrexa www.facebook.com/FestaCastrexaBurela.