O concelleiro do BNG, Bernardo Fraga Galdo, presenta ó Pleno da Corporación Municipal de Viveiro as seguintes preguntas:
1. Días atrás nos medios de comunicación, a Alcaldesa comunicaba que o Concello se faría cargo do pago das flores para as alfombras florais do Corpus. Sendo esta unha actividade relixiosa financiada polo goberno municipal socialista, preguntamos:
a. A canto ascende a factura correspondente ao pago das flores para as alfombras florais do corpus?
b. Non cree a señora Alcaldesa, que tal e como está a situación económica do Concello de Viveiro, así como a da sociedade en xeral, o pago dunhas flores para as alfombras florais, é un gasto innecesario, que está fora de lugar, e que debería ser financiado polos propios fieis da Igrexa Católica, se así o desexan?
2. Na sesión plenaria do 20 de xuño de 2013, este pleno aprobaba unha moción do BNG para instar ao goberno municipal a mellorar a páxina web municipal e a presenza do Concello de Viveiro nas redes sociais. A moción foi aprobada cos votos a favor de BNG, IVI e PP, co voto en contra do goberno municipal, alegando que votaban en contra porque era algo que xa estaba feito e asinado. Pois ben, un ano despois todo segue igual, o goberno socialista non cumpriu cun acordo plenario, a páxina web segue totalmente desactualizada, sen información das actividades e eventos de Viveiro, e o Concello de Viveiro non existe nas redes sociais(agás a oficina de turismo), e por isto que preguntamos:
a. Ten o Concello de Viveiro previsto renovar e actualizar a páxina web algún día,? ¿ou seguirán coa política de informar só dalgunhas das actividades, como a feira das maulas de galdo, ou o mercado tradicional de vieiro, que están hoxe na portada da web, excluíndo o resto da actividade que se desenvolve no noso Concello?
b. Ten previsto o goberno municipal de Viveiro, empregar algún día as redes sociais para informar ás súas veciñas e veciños?
ROGOS
1. A praia de Celeiro, está totalmente abandonada. As papeleiras revosan lixo e levan semanas sen recoller. A praia está chea de suciedade, a herba das xardineiras sen cortar. As veciñas e veciños xa non dispoñen de ducha para o verán, posto que a levou o temporal e o goberno municipal non a repuxo, o tubo de abastecemento das duchas está estendido por toda a Praia. A cimentación do letreiro indicativo da Praia está á vista e supón un perigo para os usuarios.
Existe un tubo de desaugue pertencente a Portos de Galiza, que xa non realiza a súa función, que non canaliza a auga e que ademais da unha imaxe lamentable da Praia. Esta situación é habitual, o goberno municipal ten totalmente desatendida a praia urbana de Celeiro. Cada pouco tempo repítese a mesma situación, e as veciñas e veciños están cansos.
Por isto, ROGAMOS ao equipo de goberno, que dunha vez por todas, atenda de maneira permanente e constante a Praia de Celeiro.
