O vicepresidente da Deputación de Lugo, o nacionalista Antonio Veiga, que estivo acompañado por representantes Confirmaron asistencia representantes das asociacións promotoras como a AA.CC. Francisco Lanza de Ribadeo, Seminario de Estudos Terra de Viveiro, ou AA.CC Penalba de Celeiro, foi o encargado de inaugurar esta mostra itinerante, comisariada por Uxío Breogán, que xa estivera a disposición do público no Museo de Lugo en decembro do pasado ano.
‘Nunca Máis, a rebelión dun pobo’, en palabras de Veiga, “representa a dignidade que os galegos e as galegas demostraron naqueles días de confusión e desesperación ante unha traxedia que se converteu en catástrofe grazas á despreocupación e á ineficiente xestión dun Goberno que deixou só e desprotexido a todo un pobo. Coa acción reivindicativa de Nunca Máis, mostrouse o orgullo de ser galego ou galega, o orgullo de pertencer a un pobo que defende e protexe o seu. Nunca Máis foi a chispa dun dos movementos sociais e culturais máis importantes do país durante os últimos cen anos”.
“A arte – continuou o vicepresidente- é a expresión do que acontece e sinte unha sociedade e por iso, ao redor de Nunca Máis xerouse todo un movemento cultural do cal forma parte esta exposición. Os artistas tomaron o pulso do país nun momento de tristeza e pesadume do que naceron importantes obras no eido da escrita, das artes plásticas e da música. A cultura galega de principios do século XXI xa non se pode explicar sen facer referencia ao afundimento do Prestige, á catástrofe que provocou, e á marea humana que ao seu carón xurdiu e que se plasmou en todas as ramas da cultura”.
A este respecto, o vicepresidente da Deputación tamén destacou que “non só os artistas galegos deron conta do que viviu Galiza neses días, tamén artistas do resto do Estado e incluso da esfera internacional, como foron Pablo Milanés ou o portugués Fausto, recolleron nas súas creacións a traxedia; cada un ao seu xeito mostrou a súa solidariedade co pobo galego ao igual que o fixeron milleiros de cidadáns. Naqueles días, demostrouse como a solidariedade da senso ao concepto de cidadanía”.
Coa creación desta exposición, que durante os meses de verán itinerará por diversos concellos da comarca, no afán de que chegue ao maior número de mariñás e mariñáns, a Vicepresidencia da Deputación pretende facer unha homenaxe a todo o pobo galego, a todos aqueles que se achegaron a Galiza para axudar, e ao traballo da Plataforma Nunca Máis.
Así, a mostra permanecerá no Museo do Mar ata o vindeiro 27 de xullo, aberto ao público de martes a sábado de 11:00 a 14:00 e de 17:00 a 20:00, e domingos e festivos de 11:00 a 14:00. Do 18 ao 31 de xullo estará no Conservatorio de Viveiro, e do 19 ao 31 de agosto na Oficina de Turismo de Ribadeo.