A Concellería de Educación puxo en marcha a Ocioteca por primeira vez no pasado mes de outubro, cos Pasatempos de Outono e, visto o seu éxito, seguiuse ofrecendo todos os meses ata xuño, de forma que a Ocioteca formou parte tamén dos Pasatempos Nadal, de Inverno e Primavera. Un programa que, polo tanto, converteuse nunha opción lúdica nas mañás dos sábados para todos os nenos e nenas.
En concreto, ao longo destes meses, a Ocioteca funcionou durante 30 xornadas, nas que decenas de nenos e nenas en idade escolar participaron en xogos, talleres de manualidades, prácticas de cociña, experimentos ou actividades deportivas, sempre buscando “que cada día fose entretido e que atopasen algo novo, sempre atendendo aos gustos e necesidades dos diferentes grupos de idade” asegura a edil de Educación, Pilar Armada, que estivo onte na festa. De feito, a Ocioteca ofrecíase en dúas quendas, unha para infantil e outra para primaria.
A Ocioteca despídese dando paso a outro programa lúdico, neste caso xa consolidado no tempo, como son os Enredos de verán, tamén ofrecidos dende Educación.