González Barcia dixo que “hoxe pola mañá comezou no salón de plenos do Concello de Burela un curso de divulgación da ciencia entre a sociedade, un curso de verán organizado polo departamento de Física e Química do IES Monte Castelo en colaboración coa Universidade da Coruña. Vai ter unha duración de dous días e pretende achegar a ciencia á sociedade”.
O alcalde burelés entende que “estas actividades teñen que ser apoiadas dende as administracións locais, tendo en conta o que significa achegar a ciencia á sociedade en xeral, para que se dea conta de que o termo cultura non queda reducido de forma exclusiva á literatura, á filosofía, á pintura, á arte, senón que a cultura tamén engloba aquelas cuestións que teñen que ver coa física, coa química, coas matemáticas, coa bioloxía, etcétera. Creo que é positivo porque demostra a capacidade que teñen os centros de integrarse na súa sociedade máis próxima”.
Para José Mª González Barcia “hai unha segunda cuestión que eu creo que tamén é importante e pola cal temos que colaborar dende as administracións locais fundamentalmente cos centros de ensino, que é a capacidade de apertura dos propios centros á sociedade e de ser capaces de organizar actividades que permiten a mellora na formación dos propios docentes e daquelas persoas que queren selo nun futuro máis ou menos próximo. Porque este curso diríxese a docentes que están en activo e a estudantes de física, química, maxisterio, etcétera, que dentro duns anos exercerán a súa función docente nos distintos centros de ensino”. Neste curso de verán están a participar case 40 profesionais do mundo do ensino.
O rexedor asegurou que “desde o Concello, vamos apoiar en todo momento iniciativas coma esta, dentro das nosas posibilidades por suposto. Pero é certo que os centros de ensino de Burela demostran capacidade innovadora. Os dous IES, Monte Castelo e O Perdouro, son dos institutos da provincia con máis ciclos formativos actualmente en marcha. E os dous CEIP, Virxe do Carme e Vista Alegre, destacan entre outras cousas polo plurilingüismo, por exemplo. En definitiva son centros moi activos, abertos á sociedade e, evidentemente, nosoutros vamos apoiar calquera iniciativa, dentro das nosas posibilidades, que xurda deles”.