A Noite Flúor encheu de xente as tendas e as rúas de Ribadeo ata as doce da noite

Ribadeo, 8 de agosto de 2014. A Asociación de Comerciantes, Industriais, Servizos e Autónomos de Ribadeo valorou moi positivamente a acollida que tivo a Noite Flúor, celebrada onte na vila. Dende Acisa móstranse moi contentos tanto coa participación de veciños e visitantes nas actividades que se levaron a cabo nas rúas, coma no uso que estes fixeron do comercio local. A asociación quixo agradecer a súa colaboración aos 40 establecementos que participaron nesta terceira edición do Ribadeo Aberto, así coma a todos os clientes que a fixeron posible e ao grupo Zúmballe Batukada por poñer a nota musical á xornada.

Dende Acisa afirmaron que “as expectativas eran boas para esta terceira edición do Ribadeo Aberto e cumpríronse” e recordan que “veciños e visitantes puideron gozar desta Noite Flúor grazas ao traballo dos corenta establecementos que abriron as súas portas ata as doce da noite de onte”. Tamén agradeceron a participación a tódolos clientes que acudiron aos comercios locais para facer as súas compras e aproveitaron os descontos e as promocións realizadas, ademais de seren agasallados con música, con tapas ou con cócteles nalgúns deles. Por outra banda, Acisa tamén mostrou o seu agradecemento ao grupo musical Zúmballe Batukada “por animar as rúas ribadenses dende as 9 ata as 12 da noite nesta ocasión especial”.

Acisa adiantou a súa intención de continuar levando a cabo nos vindeiros anos novas edicións deste Ribadeo Aberto.