Mondoñedo, 18 de agosto de 2014. A comisión de feiras e festas das San Lucas xa esta rematando o programa de festexos deste ano. As feiras máis antigas de Galicia celébranse este ano dende o xoves 16 ata o luns 20 de outubro.
No que se refire ás orquestras “contaremos coas mellores de Galicia”, sinala Miguel Souto, Presidente da Comisión de festas. Estarán entre outras a PARIS DE NOIA, PALLADIUM, FANIA , FILADELFIA, NUEVA GENERACIÓN, CLAXXON, MARBELLA e TEKILA.
Ademais a organización está traballando en “potenciar as emocionantes imaxes da chegada tradicional dos cabalos polas rúas da cidade ata a praza da Catedral”, relata Souto. Por iso, explica que a comisión está traballando para darlle maior difusión a este evento e dalo a coñecer cada vez a máis público, “estamos estudando poñer unha pantalla na praza da Catedral para seguir o percorrido dende os montes e vals de Mondoñedo, con conexións cos cabaleiros no percorrido, e tamén estamos buscando a posibilidade de emitilo por Internet”.
O día grande das San Lucas, o sábado 18 de outubro, centos de reses chegadas de todo o noroeste peninsular danse cita na feira de gando tradicional máis importante de Galicia, que este ano conta con preto de 6.000 euros en premios. Tamén haberá os concursos tradicionais; como os morfolóxicos, a Final da Copa Galicia, Pura Raza Galega, Andadura, Trotóns. Todos eles cos seus correspondentes premios.
O Cartel das San Lucas deste ano xa está listo, e realizouno como cada ano o artista mindoniense Xosé Vizoso.
A comisión organizadora continúa a traballar para pechar o programa de actividades que este ano vai contar con máis actuacións e actividades lúdicas e culturais que se irán anunciando nos vindeiros días.