O adestrador vivariense agradeceu “a confianza que deposita en min a directiva para continuar con este proxecto e imos intentar superar o realizado a tempada anterior. A experiencia da tempada anterior estou convencido que nos será moi útil para esta nova tempada e aínda que somos conscientes que os títulos son moi difíciles de conseguir a nosa ambición é competir para logralos”. Respecto da competición indicou que “será diferente á tempada anterior xa que hai equipos como Roldán e Gironella que están crecendo e poden estar na loita, pero sobre todo considero que Alcorcón e UA Alacante se reforzaron moi ben e serán candidatos ao título, xa non será unha loita de dúas senón que poden ser 4 ou ata 6 os aspirantes”. Do seu equipo dixo que “reforzamonos coa idea de ter unha maior profundidade de banquiño para poder realizar un reparto equilibrado de minutos e así chegar con maior frescura á recta final. Queremos ofrecerlle á nosa afección máis alegrías e devolverlles todo o agarimo que nos deron e que con seguridade continuarán dando. O ano pasado déronnos máis dunha lección co seu apoio incondicional e a nosa obrigación é continuar co compromiso e entrega que se merecen”.