María del Carmen Gueimunde González, en representación do Grupo Municipal Popular de Viveiro, realiza á Alcaldesa da Corporación os seguintes ROGOS, ó obxecto de que se subsanen as deficiencias sinaladas coa maior prontitude posible:
Ás portas do mes de agosto e vésperas das festas patronais a iluminación ornamental da igrexa de San Francisco de Viveiro segue sen lucir. Os potentes focos que iluminaban a fachada situados no segundo piso da vivenda que se ergue enfronte mesmo do monumento, hai meses que están apagados, polo que á noitiña a visibilidade no xardín que circunda o convento e na mesma praza ou atrio dificulta o tránsito dos veciños e viandantes polo lugar e facilita a entrada de intrusos no claustro en horario nocturno que aproveitan a penumbra e a escasa vixilancia para perpetrar as súas fechorías.
Sabendo que nos claustros de San Francisco se ubican diversas dependencias municipais e relixiosas rogamos á alcaldesa desta corporación proceda a corrixir esta situación restaurando a iluminación de inmediato polo ben dos veciños e dos turistas que nestes días se achegan a Viveiro para disfrutar dos seus paraxes e dos seus monumentos en todo o seu esplendor. E dado que son moitas as persoas que dispoñen de chave de acceso a este espazo solicitamos á rexedora tome as medidas oportunas para garantir a seguridade nas inmediacións do claustro reforzando a porta exterior ó mesmo e establecendo un control de apertura e peche para evitar que se repitan roubos e desperfectos na sancristía, nas máquinas expendedoras ou nas propias oficinas municipais.