Celso Dourado afirmou que “no Eido Dourado sempre apostamos polas músicas diferentes. Sempre que atopo persoas que eu considero que poden aportar algo diferente á música, póñome en contacto con elas e trato de traelos ao Eido. Neste caso imos a contar con flamenco, pero con flamenco feito en Galicia. Será o domingo a partir das 22:30 horas nos xardíns do Eido Dourado. Alí vai a estar Iria Peña Trío.”
O artista barreirense adiantou que “Iria Peña é unha cantaora para min excepcional que optou polo flamenco sendo galega, porque foi neste xénero onde atopou a súa máxima expresión dentro do que é o canto. Iria vainos ofrecer un concerto coma ela sabe facer, e estará acompañada polo bailaor ferrolán Isaías Salazar, e o guitarrista gaditano Miguel Flores, que leva anos afincado en Galicia. Creo que os tres nos van ofrecer un concerto canto menos moi diferente”.
O concerto terá lugar ao atardecer coma xa é tradicional no Eido Dourado, para combinar a luz artificial con a luz natural que existe nos xardíns do espazo artístico, creando un ambiente único, como adiantou Celso Dourado. A entrada será gratuíta ata completar aforo, aínda que dende a organización se recorda que é limitado e se recomenda acudir á xente con tempo para poder gozar deste concerto. A tempada de actuacións musicais no Eido Dourado continuará durante os vindeiros fins de semana deste mes de agosto.