Amigos da Gaita organizan “a máis importante das romarías de Ribadeo”: o Día da Gaita ou Xira a Santa Cruz que este ano se celebrará entre o sábado 2 e o domingo 3 de agosto.
Declarada de Interese Turístico Galego e Nacional, este ano a Festa da Gaita dará comezo ás 20.00 horas do sábado no Teatro de Ribadeo co pregón de Daniel Rodríguez Saavedra. A música das Escolas animará a festa ó remate do pregón.
E xa na xornada do domingo 3 de agosto cinco grupos poñerán música ó pasarrúas a partir das 10.30 horas: Froito Novo (Melide), La Amistad (Xixón), Brisas do Landro (Viveiro), Brisas da Croa (Ladrido – Ortigueira) e os anfitrións Amigos da Gaita de Ribadeo.
O Cantón dos Moreno acollerá a partir das 12.00 unha mostra dos grupos para dar paso á xira a Santa Cruz a partir das 14.00 horas. Cara ás 18.00 horas de novo ofrecerán unha mostra os grupos participantes despois da ofrenda floral no Monumento ó Gaiteiro Galego.