Segundo explicou Mario Outeiro, “a campaña consiste no reparto de 400.000 baixo pratos, ao longo destes meses, por toda a provincia de Lugo, entre os establecementos de hostalaría onde, nesta ocasión, se promocionarán as rutas fluviais que pon en marcha a Área de Turismo da Deputación: a dos Robles e Belesar, no río Miño, e a de Doade, no Sil, así como os museos pertencentes á Rede Museística: O Museo de Lugo, O Pazo de Tor, O Museo do Mar de San Cibrao, e o Museo Fortaleza de San Paio de narla, entre outros puntos de interese cultural e turístico”.
Así mesmo, o delegado de Cultura e Turismo destacou que “os baixo pratos proporcionan información básica moi útil para todos os turistas, de feito son moitos os que o levan para facer uso del e é moi común, tal e como se ten constatado en moitas ocasións, que o primeiro que fan os turistas antes de que os sirvan é apartar o prato para mirar no mapa onde están, cara onde van e que é o que van facer”.
Esta é unha iniciativa que se pon en marcha por oitavo ano consecutivo en vista da boa acollida tanto por parte dos hostaleiros, pola súa funcionalidade e servizo, coma polos turistas, que atopan nel a información básica para a súa viaxe e os seus días en Lugo. Nesta ocasión, a esta campaña publicitaria dos baixopratos súmase a iniciativa dun valo publicitario co slogan … E para comer, Lugo, en Madrid, máis concretamente no quilómetro 27 da A6 á altura de Las Rozas, un punto estratéxico tanto pola densidade de poboación como polo fluxo de tráfico, para presentar a provincia de Lugo como un reclamo turístico-gastronómico
Nesta liña, Cheché Real explicou que “visibilizar o noso slogan nun lugar tan estratéxico convértese nunha oportunidade para dar a coñecer a provincia lucense e lograr que deixe de ser un lugar invisible máis alá das nosas fronteiras; xa que as estatísticas sitúan a Madrid como o principal mercado turístico galego”. Asemade, o presidente da APELH amosou o seu agradecemento á Área de Turismo da Deputación por “axudar a pór en marcha iniciativas deste tipo, que contribúen a mellorar os índices turísticos en Lugo”.