Armada e Pedreira preguntáronlles polas actividades que realizaron nestes meses, polo que máis lles gusta facer e outros detalles das súas vacacións en Cervo. Un acto no que o Concello lles entregou agasallos desexando ao mesmo tempo que leven un bo recordo deste verán.
Un encontro no que tamén estiveron presentes as familias de acollida, que levan varios anos participando no programa Vacacións en Paz da Asociación Solidariedade Galega co Pobo Saharauí que, coa colaboración económica do Concello, fan posible que nenos como Waara e Bachrir gocen dunhas vacacións tranquilas lonxe dun clima bélico e da abafante calor do deserto.
A edil de Servizos Sociais destacou o “papel imprescindible das familias, que son as que fan un importante esforzo, totalmente desinteresado, para acoller a estes nenos, aos que tratan coma un membro máis”. “Hai que ter en conta que sen a disposición das familias este acollemento non sería posible”, engade Armada.
Ao mesmo tempo a edil lembra que este programa está aberto a todas as familias de Cervo, que en caso de estar interesadas “atoparán todo o apoio do Concello”.