A rede de saneamento e a depuradora de augas residuais de Cervo entrou en funcionamento hai dous anos e supuxo unha importante mellora medioambiental, especialmente no río Xunco, xa que esta foi a primeira vez que o núcleo de Cervo tivo un servizo de saneamento real. Augas de Galicia investira nesta infraestrutura completa máis de 1,3 millóns de euros.
Ademais, cabe destacar o innovador sistema instalado, xa que a depuración é ecolóxica e faise a través dun filtro de plantas acuáticas en flotación. Isto permite tratar a auga de forma sostible e totalmente respectuosa co medio ambiente. Ao mesmo tempo, hai que lembrar que este sistema pioneiro reduce os custos de explotación da depuradora.
A EDAR de Cervo ten capacidade para dar servizo a unha poboación de 1.500 persoas. En canto á rede de saneamento, inclúe tubaxes independentes para pluviais e residuais, de forma que a auga procedente da chuvia vai por unha canalización e a que chega dos fogares vai por outra. Con esta medida pretendeuse minimizar o risco de inundacións.