“Obxectivo: Aprender no rural” é o tema da cuarta edición do certame fotográfico “Enfocando Barreiros” do Colectivo Cultural Ollomao, cuxo prazo de participación remataba a finais de setembro. O colectivo organizador considerou oportuno ampliar o prazo ata o 31 de outubro deste 2014, para dar así máis marxe de participación ás persoas interesadas en facelo.
As bases para tomar parte neste certame poden consultarse en www.blogoteca.com/ollomao. Como vén sendo habitual nas últimas edicións existen dúas modalidades de participación: adulta, e infantil (ata 14 anos). Na modalidade adulta contémplanse un primeiro premio de 200€ e un segundo de 100€; e na modalide infantil un premio único en material fotográfico. Como novidade nesta ocasión, todas as nenas e nenos que participen no concurso terán a oportunidade de participar nun curso breve de fotografía que o Colectivo Cultural Ollomao organiza expresamente coa finalidade de servir de agasallo para as persoas que participen na modalidade infantil.
Para máis información, o colectivo barreirense pon a disposición das persoas interesadas dúas canles de contacto. Mediante correo electrónico ao enderezo colectivo.cultural.ollomao@gmail.com; ou por teléfono, no 650542932.