Estas foron as medidas adoptadas pola dirección e que xorden logo de que os edís anunciasen a pasada fin de semana a súa dimisión; unha actitude que González Santín tacha de “pouco democrática e que é produto do revanchismo”, pois considera que se debe “única e exclusivamente a desavenencias persoais”.
Neste senso, o dirixente dos socialistas manifesta o apoio decidido á executiva local, garantindo “que, ao igual que estamos a facer Foz, a dirección provincial aplicará o mesmo criterio en calquera agrupación da provincia na que se dea unha situación semellante. Os militantes teñen os mesmos dereitos e obrigas, e isto inclúe a todos e tamén aos concelleiros porque neste Partido ninguén é máis que ninguén. Ningún militante é dono do Partido. Ninguén impón nin veta aos membros do PSOE”, sentenciou.
“Actuamos con responsabilidade e conciencia política”
A executiva provincial eludiu pronunciarse ata o momento, co fin de non “seguir alimentando esta polémica e de que puidesen xurdir malas interpretacións”. “Creo que actuamos con responsabilidade política. Estes días estivemos estudando e valorando polo miúdo a situación, e fixémolo pensando sempre nos intereses dos cidadáns, antepoñéndoos incluso aos intereses do Partido. Así foi e así creo que se debe de actuar ante unha situación coma esta, pois de non ser así estariamos enganando aos militantes e aos votantes do noso Partido”.
A este respecto, insiste e que “tomamos a decisión con determinación e con conciencia política. Queremos estabilidade, e esta só pode vir da man de políticos que respecten aos seus compañeiros e á cidadanía. Os concelleiros foron por libre e iso nun Partido político como o PSOE non se pode permitir”. Deste xeito, destacou que os edís “deixaron o grupo de forma inxustificada, sen informar á executiva local nin aos afiliados. Consideramos que se trata dun desprezo a todos os militantes e aos veciños de Foz, pois foi por un tema persoal que nada ten que ver coa política”,asegura.
Para o dirixente provincial, con tal decisión os edís demostraron tres cousas: “primeiro, o seu egoísmo; segundo, que lles importa moi pouco o PSOE de Foz; e terceiro, que só miraron polos intereses persoais”. Por todo elo, considera que se trata “dunha falla de respecto e un desprezo aos simpatizantes, aos militantes, ao votantes e, en definitiva, a todos os cidadáns deste municipio mariñao; algo que dende a dirección do PSOE non imos aceptar, nin estamos dispostos a facelo”.
“Ofrecéuselles a man tendida”
Dende a dirección provincial e local, asegura Santín, “ofrecéuselles a man tendida para traballar xuntos polo Partido e por Foz. Os veciños non se merecen esta situación e tampouco os militantes e simpatizantes”. Por iso, destaca que o candidato ás eleccións sairá das primarias. “Esta dirección apoiará a todos os que libremente decidan presentarse a este proceso. O noso obxectivo é construír un proxecto político que dea resposta ás demandas dos focenses e non aos intereses dos políticos de Foz. Queremos un Partido no que teña cabida a militancia e queremos abrir o Partido a xente nova para acadar unha ampla representación na sociedade. O único que nos move é a responsabilidade e que o PSOE volva a gañar as eleccións”, conclúe.