A presidenta destaca desta asociación “a capacidade de Pedro Aguado de conectar coa mocidade que nesta ocasión enchía a sala, que nin sequera pestañeaban para non perderse nada do que lles explicaba”. O compromiso da xente nova para a non violencia, do mesmo xeito que a educación en Igualdade desde a infancia, ha de ser un dos maiores obxectivos desta sociedade para a eliminación de todo tipo de violencias”, apunta Mary Fraga, Técnico Superior en Prevencion de Violencia de Xénero e cun Master Europeo de Axente de Igualdade de Oportunidades entre Homes e Mulleres.
Mary Fraga, Presidenta de Mujeres en Igualdad Burela, sinalou “a importancia de asistir a este tipo de eventos formativos coa finalidade, de adquirir coñecementos e estar ao día tanto en cuestión de normativa como de novos avances en materia de loita contra a violencia de xénero”.
Segundo Seminario contra a violencia de xénero en Burela
Tamén avanzou ademais que Mujeres en Igualdad Burela organizará o seu Segundo Seminario Contra a Violencia de Xénero en Burela, o próximo 24 de novembro, para así conmemorar o Día Contra a Violencia de Xénero.
Neste Seminario, ademais das relatoras que xa foron invitadas na pasada edición, acudirá a senadora e Secretaria Xeral de Mujeres en Igualdad, Carmen Funez.
Para Mary Fraga “é primordial o intercambio de comunicación entre as persoas profesionais que traballan día a día en temas de violencia de xénero, xa que para conseguir a erradicación da violencia de xénero, é necesario o traballo de xeito conxunto de Administración, Centros de Información á Muller, Concellos, Asociacións, Corpos do Estado… debidamente coordinados, unindo esforzos, para así algún día poder terminar con esta lacra social”.
CRI
Mary Fraga, que fai pouco foi invitada a coñecer o Centro de Recuperacion Integral (CRI), en Santiago de Compostela, destacou sobre todas as finalidades deste centro “que sexa un punto de coordinación de todos os recursos dispoñibles, co que se consegue, unha maior prontitude para dar resposta e solución ás vítimas de violencia de xénero, en canto a aloxamentos de urxencia, simplicidade administrativa, resolucións para a protección, formación e terapias de recuperacion tanto para as mulleres vítimas de violencia de xénero, como para os seus fillos menores a cargo”.
Vivenda de urxencia para vítimas de violencia de xénero en Burela
Mujeres en Igualdad Burela xunto co Concello de Burela, presentaron o pasado mes á Secretaria Xeral de Igualdade, Susana López Abella, un proxecto para unha vivenda de urxencia para vítimas de violencia de xénero en Burela, dobremente necesaria xa que non soamente esta vivenda sería a única destas características en Burela, senón que sería a única existente en toda a Mariña Lucense”. Tanto Mujeres en Igualdad Burela coma o Concello, que xa puxo a disposición unha vivenda rehabilitada na antiga casa dos mestres deste municipio, están “esperanzados en que a Xunta de Galicia poida colaborar na posta en marcha desta vivenda tan necesaria, que necesita de financiamento para poder habilitar o seu interior con mobles e enseres para poñela en funcionamento”.
Mary Fraga quere destacar “o compromiso, implicación e colaboracion do Concello de Burela, especialmente do seu alcalde José González Barcia, na prevención e a loita contra a violencia de xénero”.