O alcalde, Alfonso Fuente Parga, visitou hoxe a obra e explicou que “o que se está a realizar na parroquia de Reinante é urbanizar os primeiros 150 metros dende a estrada nacional pola baixada cara á praia. Vanse dotar de beirarrúas e de iluminación pública. É un espazo onde se iniciou unha promoción que está parada. É a entrada da parroquia de Reinante e onde vive o maior número de veciños e había que urbanizar esa zona”.
O alcalde barreirense indicou que “vanse investir 199.000 euros. Ao mesmo tempo aproveitamos para facer un topo na estrada nacional e a nova traída de auga dende o depósito que se fixo en Reinante vaise pasar para a parte de abaixo. Dótase tamén dun tubo de máis sección neses 150 metros, o que vai supoñer unha mellora do servizo naquela zona. Tamén se van recoller as augas de pluviais. Con todo isto a entrada da parroquia de Reinante vai quedar nunhas mellores condicións unha vez que estea urbanizada”.
O rexedor municipal de Barreiros prevé que estas obras estarán rematadas dentro de dous ou tres meses.