Lugo, 24 de novembro de 2014.- A Consellería de Educación, Cultura e Ordenación Universitaria instalou xa, de forma provisional, un depósito auxiliar de combustible no CEIP Juan Rey, do municipio de Lourenzá, que facilitará o subministro de combustible durante os próximos meses para o sistema de calefacción no centro.
Logo do verquido detectado o pasado venres no depósito principal deste centro educativo, o departamento educativo dispuxo inicialmente o uso dun depósito secundario co que xa contaba o colexio e que permite o abastecemento para preto dunha semana. Pero, ao tempo, plantexouse a instalación inmediata dun tanque de maiores dimensións que permitise o subministro normal durante un espazo de tempo máis amplo, como se ven de concretar no día de hoxe.
Por outra banda, os equipos de emerxencia que realizan seguimento da situación do río Baos tralo citado verquido manterán as barreiras e a as mantas absorbentes para recoller os pequenos restos de combustible que aínda afloren na zona da ponte de Cuñas despois das choivas da fin de semana.
A medida, que se revelou como positiva durante toda a fin de semana, ten por obxecto captar todos os fragmentos de verteduras que poidan aparecer os próximos días en forma de irisacións.
Neste sentido, tanto persoal do parque de Bombeiros de Barreiros como o GES de Cervo seguirán realizando seguimento da situación e serán os encargados de recambiar estas barreiras no caso de ser necesario.