Cervo convoca a III Larpeirada de ourizo de outono e o III Concurso de debuxo infantil “A Castaña”

Cervo, 12 de novembro de 2014- A Delegación de Cultura vén de convocar dous concursos xa tradicionais nesta época do ano, un dirixido ao público adulto e outro ao infantil. Así, por terceiro ano consecutivo, celebrarase a Larpeirada de ourizo de outono, un certame de sobremesas elaboradas a base de castañas no que poden participar todas as persoas que o desexen (22 de novembro, Casa da Cultura). Para iso cada concursante terá que preparar un postre no que a castaña sexa o ingrediente predominante.

As bases do concurso xa están dispoñibles na Casa da Cultura. En canto ao programa de actividades do día 22, o concurso comezará ás 17 horas coa recepción das sobremesas na sala de exposicións. A cada postre asignaráselle un número para garantir o anonimato e un xurado encargarase de degustar e valorar cada prato. Ás 18 horas farase pública a decisión do xurado e farase entrega dos premios. Ao remate ofrecerase un magosto popular.

Ademais, durante a xornada tamén se coñecerán os gañadores do III Concurso de debuxo infantil “A Castaña”, no que poden participar nenos e nenas de 3 a 12 anos. Para iso teñen que presentar un debuxo coa castaña como temática principal, con técnica libre, e sobre papel ou cartolina en tamaño máximo DIN A4. O prazo permanece aberto ata o 21 de novembro e os traballos terán que entregarse na Casa da Cultura ou na Casa do Concello.

A edil de Cultura, Begoña Alonso, explicou que estas actividades póñense en marcha co obxectivo de “exaltar este producto gallego y de temporada, y también poner en valor sus posibilidades culinarias”. Alonso destaca que con este certame “queremos potenciar la originalidad a la hora de preparar las castañas y, al mismo tiempo, compartir esas nuevas recetas con los demás para sacar el máximo partido a este fruto de otoño”.