As boas sensacións que deixaron na pretempada confirmáronse no incio da Liga Provincial Masculina de Lugo. Os barreirenses impuxéronse con solvencia a todos os seus rivais na primeira das catro voltas das que consta a competición: Cubelas (5-0), Samos (1-7), Talleres Vilaboa (7-1), Peña Españolista Sarria (1-7). O Praias iniciou a segunda volta da mesma maneira, impoñéndose ó Cubelas (2-7) nun encontro disputado en Ribadeo. O dominio do conxunto barreirense é notable, lideran a clasificación con 15 puntos de 15 posibles, con 33 goles a favor e tan só 5 en contra.
Fútbol sala solidario
O próximo sábado 27 de decembro disputarán un encontro adiado fronte ó Samos FS (18.30h). O Pavillón Municipal de Barreiros será o escenario do último encontro do 2014, unha data especial que a directiva do conxunto barreirense quere converter nunha data solidaria. Por iso puxeron en marcha unha campaña na que recollerán alimentos non perecedeiros para doalos ás familias máis necesitadas do concello.