A Banda de Música Municipal de Ribadeo e o Coro Sagrado Corazón encheron o auditorio Hernán Naval cun concerto solidario coa loita contra o cancro infantil

Ribadeo, 5 de xaneiro de 2015. A Banda de Musica Municipal de Ribadeo, dirixida por David Ballester, e o coro Sagrado Corazón, baixo a dirección de Mari Carmen Rodríguez Cancelo, encheron o auditorio ribadense Hernán Naval no concerto solidario para a loita contra o cancro infantil, que se celebrou este sábado 3 de xaneiro.

A banda, con máis de sesenta compoñentes xa que para esta actuación incorporáronse cerca dunha vintena de ex integrantes da formación, interpretou oito pezas: Los chicos del coro, de Bruno Colais; Lugo-Ferrol, de G. Baudot; Balada galega, de J. Montes; Simple symphony, de Kees Vlak; A medieval suite, de A. Waignein; Brasiliana, de Jan Van der Roost; Concerto d´amore, de Jacob de Haan; e We are de world, de Michael Jackson. Neste último tema contou co acompañamento do coro Sagrado Corazón, formado por 30 compoñentes, xa que aos actuais engadíronse algúns ex integrantes que forman parte agora da coral polifónica de Ribadeo.