Esta actitude “irresponsable” por parte da Xunta obrigou á Area de Benestar Social da Deputación a suplir con fondos da Deputación os cartos que antes poñía a Xunta “para non deixar tirados á meirande parte dos cidadáns da provincia de Lugo en materia de servizos sociais”, afirmou esta mañá en rolda de prensa o vicepresidente da Deputación e responsable da área de Benestar Social, o nacionalista Antonio Veiga, que deu a coñecer a sentenza.
O Tribunal Superior de Xustiza de Galiza afirma que “existen serias dúbidas de dereito” en relación ao Decreto 99/2012 de Servizos Sociais aprobado pola Xunta de Galiza e que “adolece dunha imperfección técnica en canto a grado de precisión que impide a súa aplicación automática”, polo que insta á Xunta a “modificalo para precisar o reparto de responsabilidades de cofinanciación”. Mentras tanto, a sentenza do Alto Tribunal galego considera necesario que a Xunta asine Convenios de colaboración coas distintas Deputacións de cara a cofinanciar entre ámbalas dúas administracións os servizos sociais básicos nos concellos de menos de 20.000 habitantes.
A sentenza afectaría á maioría dos 67 Concellos da provincia de Lugo, agás á cidade de Lugo e vilas coma Monforte, Sarria ou Vilalba, que superan os 20.000 habitantes. Antonio Veiga afirma que “a sentenza ven a dicir que o decreto 99/2012 de Servizos Sociais aprobado pola Xunta é unha auténtica chapuza”, sentenciou.
Reclamación das cantidades non aportadas pola Xunta desde 2012
O Tribunal Superior de Xustiza dá a razón deste xeito á Deputación de Lugo, posto que considera que a Xunta de Galicia ten que cofinanciar os servizos sociais nos Concellos de menos de 20.000 habitantes. Así o manifesta en reiteradas ocasións na sentenza. Por este motivo, a Deputación está a estudar os posibles mecanismos legais para reclamar á Xunta os cartos que adebeda aos lucenses dende 2012.
Segundo avanzaron tanto o vicepresidente nacionalista, Antonio Veiga, como o voceiro socialista, Manuel Martínez, esta mañá na rolda de prensa posterior á Xunta de Goberno, a Deputación de Lugo estuda presentar novas accións legais porque “agora haberá que aclarar canto tiña que ter aportado a Xunta desde o 2012 para servizos sociais na provincia de Lugo”, insistiron. “Son cartos que Feijóo debe aos lucenses e ás lucenses, porque non son cartos para a Deputación de Lugo, senón cartos para servizos sociais nos concellos da provincia de Lugo”, dixo Antonio Veiga, mentras Martínez insistía en preguntar, a raíz da sentenza, “onde están os cartos da Xunta para servizos sociais de 2012, 2013, 2014 e 2015?”
A Deputación incrementou un 30% os fondos sociais para suplir o que non pon a Xunta
O responsable da área de Benestar da Deputación, o nacionalista Antonio Veiga, explicou que a institución provincial tivo que poñer este ano un 30% máis para Benestar social nos seus Orzamentos para “suplir o que a Xunta tiña que poñer e non pon”. Puxo como exemplo o servizo de axuda no fogar, para o que a Deputación aporta en solitario 700.000 euros.
Veiga fixo fincapé en que “as necesidades sociais aumentan e máis nestes tempos de crise”, polo que “os recortes da Xunta do señor Feijóo afectarían a moitos cidadáns e cidadás da provincia de Lugo se non fose pola Deputación, que incrementou este ano os seus Orzamentos para servizos sociais de 3,4 a 4,5 millóns de euros.
Dentro das partidas destinadas a Benestar Social destaca a dirixida a Prestación de servizos a persoas dependentes e asistencia social, que alcalza practicamente os 3 millóns de euros, destinados a manter servizos como o de Axuda no Fogar (700.000 euros) e Teleasistencia (350.000 euros), así como 900.000 euros para a construción e posta en marcha de 6 residencias de maiores en toda a provincia: Ribadeo, Castroverde, Trabada, Fonsagrada, Pedrafita do Cebreiro e Pol.
Feijóo asinou convenios con todas as Deputacións agás a de Lugo
O voceiro provincial socialista, Manuel Martínez, lembrou, pola súa banda, que “Feijóo negouse a asinar un convenio coa Deputación de Lugo, que si asinou coas restantes Deputacións galegas, para financiar os servizos sociais na provincia luguesa. Todo isto, a pesares das reiteradas reclamacións que lle fixemos desde 2012, e de ata redactarlle un borrador de convenio, que por suposto lle enviamos, sen obter resposta algunha. Fíxense, mentres a Xunta de Feijóo non concedeu nin un só euro aos lucenses para servizos sociais nos últimos 4 anos, o Goberno galego do PP achegou en 2012 e 2013 preto de 25 millóns de euros aos veciños de Pontevedra, A Coruña e Ourense a través dos convenios que si asinou coas Deputacións destas provincias. Vamos a esixir, unha vez máis, a Feijóo que asine coa Deputación de Lugo o convenio de servizos sociais. Feijóo non pode seguir discriminando aos lucenses como fai con Radioterapia, Hemodinámica as 24 horas e Medicina Nuclear”, argumentou.
“A Deputación de Lugo nunca se negou a recibir unha competencia máis da Xunta de Galicia. O que sempre reclamou foi o financiamento para poder facelo. Hai que ter en conta que o organismo provincial lugués ten un orzamento máis de 100 veces inferior ao da Xunta de Galicia”, comparou Martínez.
Pese a darlle a razón á Deputación nos seus argumentos, o TSXG desestima o recurso presentado pola institución provincial lucense, ao entrar a xulgar unicamente a potestade legal da Xunta na aprobación deste Decreto e non “a actuación da Xunta de Galicia en relación coa aplicación do mesmo”, polo que o organismo provincial está a estudar tamén a posibilidade de recorrer esta sentencia no Tribunal Supremo.