A portavoz comarcal nacionalista Ana Ermida afirmou que a reparación e rehabilitación do firme das estradas de competencia estatal N642 e N634 “é xa un clamor popular, érao fai uns meses e agora moito mais”. A nacionalista cualificou a condución por estas estradas de “deporte de risco que obriga a unha condución que pon en grave perigo á poboación obrigada a salvar as múltiples fochancas e irregularidades do firme”. A situación, segundo Ermida, sófrena todas as persoas que circulan polos concellos que atravesa a N642 desde Barreiros ao Castelo en Cervo ou pola N634 desde Barreiros a Abadín por Lourenzá e Mondoñedo.
Desde o BNG mariñao lembran que o Ministerio de Fomento unicamente ten consignada unha partida económica nor orzamentos 2015 para labores de mantemento e reparación de firme en 12 kms. da N642 ao seu paso polo concello de Foz pero aínda non iniciaron as obras. Os nacionalistas consideran insuficiente esta reparación xa que as necesidades de mellora nas vías de competencia estatal tendo en conta o seu estado, deberan ser globais afectando á maioría dos tramos.
Ana Ermida Igrexas anunciou que a formación nacionalista trasladará ao Congreso a través da deputada Rosana Pérez a situación de abandono destas estradas, reclamando ao Ministerio de Fomento actuacións inmediatas nestas dúas estradas.