O novidoso plan de captación de talento inclúe dúas medidas:
– “Premiaremos aos mellores expedientes de BAC e FP que queiran cursar a súa titulación de Grao no Campus de Lugo, sufragando o custe íntegro da súa matrícula”, explicou Gómez Besteiro. Para iso, a Deputación vai custear os 6 mellores expedientes que se matriculen na convocatoria deste mes de xullo, en cada unha das 15 titulacións de Grao que hoxe ofrece o Campus. Das 6 matrículas gratuítas para cada titulación de Grao, 4 serán para estudantes de BAC, e 2 para estudantes de FP. Polo tanto, 90 estudantes beneficiaranse desta proposta no curso 2015-2016.
– “Imos premiar aos mellores expedientes que se gradúen no Campus de Lugo, sufragando a matrícula gratuíta dunha titulación de Máster no noso Campus”, asegurou o Presidente. A Deputación ofrecerá tres premios para os tres mellores expedientes graduados en cada unha das 15 titulacións do Campus de Lugo entre xaneiro e xullo deste ano. É dicir, en total 45 premios, que consistirán nunha bolsa de matrícula gratuíta para que poidan facer un máster no Campus no curso 2015-2016. Dentro do desenvolvemento curricular do máster, en colaboración co departamento correspondente da Universidade, as persoas premiadas con este plan de captación de talento colaborarán con diversos departamentos da Deputación, como o Centro de Recría ou o Centro de Interpretación das Reservas da Biosfera.
En total, as dúas iniciativas supoñen para a Deputación un desembolso de 108.000 euros e beneficiarán a 135 mozos. Os estudantes que xa teñan a matrícula gratuíta por outra razón non gozarán desta axuda, que pasará á seguinte persoa.
Os resultados do plan de choque
Pola súa banda, o Vicerreitor do Campus agradeceu “esta nova iniciativa da Deputación”, que reforza as accións do plan de choque que o organismo lucense e a Universidade puxeron en marcha o pasado ano, cunha dotación de 500.000 euros do Orzamento provincial, e que “será máis efectiva porque a planificamos con máis tempo”.
Neste senso, Javier Bueno destacou que o plan de choque “rompeu coa tendencia” de baixada que experimentaba o Campus nos últimos anos “coa promoción de Lugo como cidade universitaria, destacando as súas fortalezas”. Segundo informou o vicerreitor, as primeira matriculacións pasaron de 677 no curso 2013-2014 a 741, neste 2014-2015. No caso das 7 titulacións con menor demanda, cuxa primeira matrícula a Deputación financiou nun 50%, o incremento foi dun 40%, pasando de 137 a 191.
Destaca a subida de graos como o de Ciencias da Cultura, que pasou de 12 a 45 alumnos. A Deputación continuará este curso 2015-2016 con esta liña de financiamento do 50% da matrícula das titulacións do Campus con menor demanda.
Tamén deu bos resultados a campaña para promover cursos de verán, pois, segundo Javier Bueno, hai 25 propostas preseleccionadas para esta tempada –na actualidade en fase de resolución-, fronte ás entre 13 e 15 do pasado ano, o que supón un incremento do 70%.
A creación da figura do coordinador do programa ponte do Campus supuxo que 500 alumnos de ensino medio pasasen entre os meses de febreiro e marzo polas facultades lucenses, o dobre que o ano pasado. En canto ao plan de captación de estudantes doutras nacionalidades deu como resultado un aumento do 13% no número de mozos estranxeiros que cursan titulacións en Lugo.