Burela, 19 de marzo de 2015. En Burela recolléronse no 2014 un total de 154.730 quilos de vidro nos iglús instalados para este fin, segundo os datos que hoxe deu a coñecer a concelleira de Medio Ambiente, Patricia López Eijo. Esta cifra supón un descenso do 10’17% con respecto ao ano anterior.
A edil popular indicou que “no 2014 cada burelés depositou 16,02 quilo de vidro nos iglús instalados na nosa vila. É un valor sensiblemente superior ás medidas provincial, autonómica e estatal correspondentes ao 2013, e que se situaron en 4’1, en 2,18 e en 1,43 puntos, segundo datos facilitados por Ecovidrio”.
López Eijo dixo que “no pasado ano o reciclado de vidro recollido en Burela supuxo un aforro de 186 toneladas de materias primas e máis de 20.150 litros de petróleo”. Desde o Concello insisten “na necesidade de seguir reciclando tanto o vidro coma o resto do lixo. O que non se debe facer é tirar as botellas nos contedores verdes, porque iso supón que o lixo que vai a Sogama pese máis e como consecuencia o Concello teña que pagar máis por el. Hai algunha zona de Burela na que detectamos a presenza de vidro nos contedores de recollida de residuos sólidos, de aí que fagamos unha nova chamada á colaboración para que os veciños e as veciñas de Burela non baixen a garda”.
En Burela hai 67 colectores operativos, o que supón unha ratio de 144 habitantes por colector e 19,38 litros/habitante de capacidade dispoñible.
A concelleira de Medio Ambiente agradece “aos veciños e veciñas de Burela a súa colaboración na reciclaxe do vidro e animámolos a seguir neste liña e así ser partícipes da nosa responsabilidade ambiental”.
López Eijo engadiu que “o departamento de Medio Ambiente realizou un informe exhaustivo da situación en cada un dos colectores a pe de rúa e en datas próximas reunirémonos con representantes da empresa que xestiona a recollida para optimizar o servizo e incrementar a recollida”.