Ribadeo participa neste 2015 na segunda edición do proxecto ‘Todocosmos, a astronomía ao alcance de todos’

Ribadeo, 5 de marzo de 2015. O Observatorio Astronómico Ramón María Aller da USC organiza, en colaboración con 12 concellos galegos e co financiamento da Fundación Española para a Ciencia e a Tecnoloxía (FECYT), a segunda edición de TodoCosmos, unha actividade de divulgación astronómica a desenvolver durante todo o ano en Galicia. Ao acto de presentación que tivo lugar esta mañá en Compostela asistiu o concelleiro de Medio Ambiente, Horacio Cupeiro, porque Ribadeo é un concellos que participa no proxecto.

O edil nacionalista explicou que “se acaba de presentar no reitorado da Universidade de Santiago de Compostela o proxecto no que participa o Concello de Ribadeo A astronomía ao alcance de todos, que dirixe o responsable do observatorio Ramón María Aller, José Ángel Docobo. Este proxecto está financiado pola Fundación Española para la Ciencia y la Tecnología (FECYT)”.

Cupeiro dixo que “o Concello de Ribadeo agradeceu ao director o gran cariño que ten polo noso municipio, xa que nos trouxo o ano pasado a unha comisión de científicos internacionais en mecánica celeste. E este ano gozaremos dun importante número de charlas e observacións, das que iremos dando conta”.

O concelleiro de Medio Ambiente indicou que “a filosofía é acercar a ciencia ás persoas ás que doutra maneira lles sería imposible. E tamén queremos abrirlles un novo horizonte aos rapaces”. Ao longo das vindeiras semanas o Concello manterá encontros cos centros de ensino para perfilar o calendario de actividades a desenvolver.