Veciños Independentes de Alfoz reúnese con representantes da protectora de animais do Val

Coa intención de escoitar ós veciños e veciñas de Alfoz, así coma ós colectivos que os representen, Veciños Independentes de Alfoz segue realizando reunións para engadir as súas peticións ao seu programa.

Neste afán, representantes de Veciños Independentes de Alfoz veñen de reunirse con membros da Asociación Protectora de Animais Valadouro Alfoz. Representantes da protectora indicaron o traballo que están a realizar, de forma totalmente altruísta, coa recollida e coidado dos animais abandonados de ambos concellos. Tamén contaron que para o coidado dos animais contan basicamente con casas de acollida e doazóns particulares. Á parte de falar dos compromisos que teñen actualmente coas dúas administracións locais, tratáronse outros temas coma as responsabilidades con respecto ó abandono de animais e as instalacións necesarias para poder realizar o coidado dos mesmos.

Na xuntanza os representantes de Veciños Independentes de Alfoz eloxiaron o traballo que está a facer este colectivo e mostraron o seu total apoio ás súas iniciativas.