O sábado día 25 de abril a furgoneta do Club Kayak acenderá os motores ás seis da mañá para desprazarse ata O Grove. Alí, a partir das 10:00 da mañá, o Club Kayak enfrontarase á primeira cita do fin de semana: a XII Travesía da Toxa -XXIX Trofeo Concello do Grove 2015 para embarcacións K2 e K4. Nesta regata o Club Kayak participa co K2 cadete formado Juan Rivas e Noel García e o K2 xuvenil formado por Jesús Alarcón e Javier Vila. O percorrido da proba – tanto para cadetes coma para xuvenís – será de 5000 metros consistente en dúas voltas a un circuíto balizado.
Xa na matinal do domingo, todo o club, dende os máis peques, os benxamíns, ata os veteranos desprazaranse ata as instalacións do Club Fluvial de Lugo para participar, a partir das 10:00 da mañá, na primeira regata da ‘V Copa Deputación de Lugo de Piragüismo’, un evento que, malia a súa curta idade, xa está totalmente consolidado no calendario do piragüismo galego.