O goberno do PP no Estado español aprobou o pasado ano o Real decreto-lei 8/2014, do 4 de xullo, que leva aparellado o traspaso dos rexistros civís aos rexistros da propiedade e mercantís. Desaparece, así, un servizo público que se prestaba gratuitamente en todos os Concellos e pasan a rexistradores privados onde se gravan cun arancel as prestacións realizadas aos usuarios e usuarias. Dese xeito, un servizo até o de agora gratuíto acabará converténdose nun de pago obrigado, o mesmo modelo privatizador de servizos públicos que o PP xa foi introducindo na sanidade ou nos servizos sociais para que as persoas usuarias sexan as que custeen os servizos.
O Rexistro Civil é un servizo público e gratuíto que que regula os datos básicos e esenciais de cada persoa (data de nacemento, defuncións e calquera outro avatar vital) e cumpre numerosas funcións que son indispensábeis para a vida diaria de calquera persoa: inscrición de nacementos, estado civil, cambio de nome ou sexo…, o que o converte nun servizo imprescindíbel. Todas as persoas precisan nangún momento expedir documentos básicos para acreditar a súa situación persoal, uns documentos que, á súa vez, son obrigatorios en moitos casos para cobrar pensión, prestacións de servizos sociais ou axudas públicas.
Con esta decisión o PP rompe o consenso que houbo en 2011 sobre este tema, xa que o modelo aprobado en 2011, que deu luz verde á desxudicialización dos Rexistos Civís, fora produto dun amplo consenso entre o personal da Adminsitración de Xustiza, as CC.AA e as entidades locais, partes todas implicadas até no Rexisto Civil. Por iso resulta máis inexplicábel este cambio de orientación imposta polo Ministerio, ao pasar dun sistema de amplo apoio a un que está un amplo rexeitamento social.
Os cidadáns terán que pagar por certificados e inscricións
O portavoz do BNG na Deputación pón de manifesto que ante a eliminación dos Rexistos Civís e a súa adscripción ao sistema rexistral da propiedade e mercantil cuxo financiamento se basea en exixir o pagamento pola expedición dos seus servizos, os cidadáns terán que pagar pola tramitación de numerosos expedientes e no futuro deberán custear determinadas inscripcións e certificacións.
Salienta o portavoz nacionalista na Deputación que os rexistradores mercantís son funcionarios pero o seu sistema de retribución en base a aranceis que satisfaen directamente os cidadáns que acceden aos seus servizos, fai que teñan un modelo de xestión privado, ao que se lle aplican procedementos propios do dereito privado.
Alonxamento dos servizos á poboación
Ao BNG preocúpalle outro aspecto fundamental desta decisión: o alonxamento da cidadanía deste servizo. Nos Rexistros Civís hai trámites sinxelos, mais outros requiren acudir en persoa. En moitos casos moitos cidadáns e cidadás terán que facer longos e custosos desprazamentos, pois recentemente confirmouse que o Rexistro vai ser asumido unicamente por aqueles que teñen competencias mercantís. O mapa, pois, en Galiza ficaría só con rexistros na Coruña, Santiago, Lugo, Ourense e Pontevedra, fronte á actual presenza dos rexistros civís en todos os Concellos galegos.
“Documentos e cetificados que agora os cidadáns obtiñan a carón da casa, no seu Concello, agora só poderán solicitalo e obtelo na capital da provincia”, alertou o voceiro do BNG. En relación a este feito, Mario Outeiro advirte que se trata “dun chanzo máis da política do PP de desmantelamento de servizos públicos no rural” e da intención do PP de “centralizar todos os servizos nas capitais de provincia”.
Agasallo aos amigos de Rajoy
Despois de ter investido inxentes recursos públicos para a modernización e dixitalización dos rexistros civís, agora póñense en mans privadas, impoñendo taxas que non ingresarán nas arcas públicas senón nas dos rexistradores directamente. E, a maiores, a protección de datos persoais e obrigatorios que contén o Rexistro Civil queda en evidencia ao se poñer en mans de persoal que non ten o carácter de funcionariado público nin o deber de confidencialidade. Sen esquecer tampouco a previsíbel perda de postos de traballo do persoal que se encarga agora dos Rexistros Civís, dependente agora do Ministerio de Xustiza. O Ministerio só se comprometeu a recolocalos nos xulgados o que á vez pón en perigo o posto de traballos de miles de interinos.
“En que se basea o Ministerio para traspasar a máns dos rexistradores mercantís e da propiedade a xestión dos Rexistos Civís? Non sería máis axeitado que fosen considerado un rexisto administrativo xestionado por funcionarios públicos específicos, de xeito gratuito ou baxo a supervisión de Secretarios Xudiciais? “Rajoy non quixo traspasar esta competencia ás comunidades autónomas, pero consuma un despropósito deste calibre para beneficiar aos amigos e colegas de profesión do presidente do Goberno”, denunciou o portavoz nacionalista.