Este paso resulta indispensable para poder levar a cabo o expurgo, un proceso complexo cuxa tramitación leva meses, polo que desde Xustiza destácase a colaboración destes órganos xudiciais. Está previsto que a actuación continúe a próxima semana, coa retirada de 78 caixas máis nestes mesmos xulgados.
Tras a gravación de expedientes, o seguinte paso será a realización dun estudo das series documentais e dos organismos produtores por parte do persoal técnico de arquivos e a súa remisión á Xunta de Expurgo, xunto cun informe da Consellería competente en materia de patrimonio documental.
Posteriormente, a Xunta de Expurgo emitirá un acordo no que se determine o destino final da documentación e publicarase no DOG e en prensa, dando un prazo de dous meses para que as partes interesadas do procedemento poidan solicitar documentación.
Finalmente, procederase á destrución ou envío dos expedientes a un arquivo histórico, cando se aprecie interese documental. Pero ademais estanse a contemplar outras accións complementarias como a habilitación de novos espazos para recolocar a documentación.
Máis espazo nos xulgados
O ano pasado a Xunta puxo en marcha o proceso de expurgo que permitirá aos xulgados galegos gañar ata un 75 por cento de espazo nas sedes xudiciais galegas e conservar adecuadamente os documentos con valor histórico.
Ademais, mediante o expurgo tamén se facilita o acceso á documentación nos arquivos xudiciais, hoxe en día desbordados, configurándose este proxecto como un un paso máis dentro do obxectivo de modernización da nosa Administración de Xustiza no que traballa a Xunta desde a lexislatura pasada.
En Galicia existen 50 arquivos xudiciais, os do Tribunal Superior de Xustiza de Galicia, as catro Audiencias e os 45 partidos xudiciais; algúns deles con expedientes que datan do seus inicios a comezos do século pasado. Estimase que en total estean almacenados uns 3 millóns de expedientes, con máis de 150 millóns de folios.