Explosión de futsal ao aire libre

Burela, 18 de xuño de 2015.- A praza da Mariña de Burela acolleu na tarde deste xoves a terceira edición da Xornada de Fútbol Sala na Rúa con grande acollida entre a xuventude de dentro e fóra da localidade. A actividade, organizada pola Fundación Imdecum, contou coa colaboración do CD Burela FS Pescados Rubén, coa visita de xogadores e técnicos, e de IG10 Activity Center, coa cesión das pistas inchables.

Numerosos rapaces/as achégaronse á cita futboleira para pasar unha entretida tarde lúdico-deportiva, afinando pase, regate e gol. Os pequenos/as dispuxeron de dúas pistas inchables e unha portería xigante compartindo habilidades con algúns xogadores laranxas de Primeira División, como o capitán Iago Míguez ou os prometedores Hélder, Erik ou Renato. Tamén participaron na xornada o secretario técnico do club burelista, Juanma Marrube, e os adestradores Juanlu e Neco, ademais do profesorado da ED Burela FS.