Na Feira do Bonito preténdese transmitir esta cultura do mar considerando vital a implicación da xente para que a valore con orgullo. Esforzándose porque os fillos do Cantábrico acudan e sintan como súa unha Feira que mezcla tradición e modernidade.
Música toda a fin de semana, descenso de carrilanas, tapas nos locais de Burela, actividades para as nenas e nenos, olimpiadas da costeira (xogos por equipos), campionato de xadrez, racións de bonito de xeito continuado e a presentación do Festival Osa do Mar compoñen un completo programa organizado por Ledicia coa colaboración de Fanto Fantini, ACIA Burela e o Concello de Burela.
A súa completa programación e importancia simbólica convírtena nun plan perfecto tanto para turistas como para toda persoa da Mariña. Desde a organización destacan o esforzo realizado para ofrecer unha Feira do Bonito atractiva para todos os públicos e animan a todos os burelaos e burelás, turistas e á xente da Mariña a asistir e participar nas actividades de toda a fin de semana.