“O pasado mércores remataba o programa de Noites Alternativas coa actividade de orientación na que participaron 40 nenos e nenas de distintas idades buscando pistas por todo o pobo de San Ciprián para conseguir formar unha palabra secreta que lles faría gañadores da actividade. A actividade tivo gran acollida, con catro grupos de dez nenos e nenas acompañados por monitores que remataron a busca na Praza dos Campos, onde recibiron as medallas os gañadores e tamén houbo algo para todos os demais participantes. Ao remate da actividade fixéronse xogos de baile na praza”, comentou Dolores García.
A actividade de orientación pechou o programa Noites Alternativas organizado polo Concello de Cervo, que empezou o 13 de xullo e incluíu tamén volei praia, fútbol praia, baloncesto 3×3, fútbol 3×3 e a Noite do Patín.
A concelleira de Xuventude rematou anunciando que o Concello de Cervo “seguirá apostando por este programa, xa que hai destacar que cada ano ten mais acollida de participantes en cada actividade e é unha forma alternativa de que os mozos e mozas pasen as noites de verán practicando deporte e se entreteñan todos xuntos”.