Gaia e a concelleira de Medio Ambiente de Burela repartiron cinceiros ecolóxicos na praia do Portelo

Burela, 8 de agosto de 2015.- As monitoras de Gaia, acompañadas pola concelleira de Medio Ambiente, Noelia Mª Ben, repartiron cinceiros ecolóxicos na praia do Portelo este venres pola tarde, aproveitando a presenza do público que ía asistir á representación teatral ao aire libre que tivo lugar nese areal.

Desde a Aula Medio Ambiental Gaia explican que “os cinceiros están pensados para tirar as cabichas ou as cáscaras das pipas mentres estamos a gozar dun día de praia, logo baléiranse nun colector e son reutilizables”.

Trátase dunha medida adoptada pola Concellería de Medio Ambiente para manter as praias de Burela limpas. Ademais hai cinceiros ecolóxicos nos postos dos socorristas dos areais a disposición dos usuarios, de forma totalmente gratuíta.